SOMO: BWANA AWAJUA WALIO WAKE

MHUBIRI: ASKOFU NATHAN MESHACK

MAHALI: FGBF MWANZA 21.01.2018

MWANDISHI: Zachary John Bequeker

                                Askofu Nathan Meshack na mkewe Susan Meshack

=>Mungu anawajua walio wake ( 2 TIMOTHEO 2:19). 

Waitwao ni wengi wateule ni wachache (MATHAYO 22:14), Wakati wote mtu wa Mungu jiweke katika kundi la wateule ambao wameyatoa maisha yao kwa Bwana Yesu, ambao wanahesabu dunia hii kuwa kama mavi na kuona si kitu cha kushikamana nacho (WAFILIPI 3:8).

Waitwao wengi wako kwenye majengo ya ibada wala hawalijui neno la Bwana na hawajadhamiria kwenda mbinguni. Haakuna faida ya kuhudhuria ibada halafu ukaikosa mbingu.

Wateule wako tayari kwa lolote lile mpaka wamuone Bwana.

Walioteuliwa(wateule) wakati wote huwa wako katika kundi maalum. Hivyo wateule wanakuwa wana uhakika wa kwenda mbinguni .

Hatupaswi kuishi maisha ya unafiki, kwani wanafiki hawatamwona Mungu .

Mteule anakuwa wakati wote anajilinda ili asimchukize yeye aliyemteua.

Ni bora kujulikana na Mungu kuliko kujulikana na wanadamu. Ukijulikana na Mungu unakuwa na nafasi nzuri kuliko kujulikana na wanadamu . ukijulikana na Mungu yeye(Mungu) anachukua mizigo, matatizo na mambo mengine yanayokuwa kati yako.

Watu hufanya dhambi kwa sababu hawajajulikanI na Mungu  hivyo hawatambuliki kwake kwa sababu ya dhambi zao (ISAYA 59:2).

Mtu anayejulikana na Mungu hawezi kufanya dhambi kwa sababu anajua Mungu anamuona wakati wote na mahali popote anapokuwa kwa sababu Mungu amemchora katika vitanga vyake, mtu huyu anapoomba lolote kwa Mungu husikiwa na kujibiwa (ISAYA 49:14-19).

Ishara ya kumtambua mtu anayejulikana na Bwana ameachana na uovu(2 TIMOTHEO 2:19).Maovu hayatakiwi kuonekana kwa watu wa Mungu.Masengenyo,wivu,uasherati,uzinzi,wivu,chuki,uchawi,fitina,uzushi,uadui,ugomvi,ulevi, na mambo mengine yanayofanana na hayo ni matendo ya mwili(uasi) (WAGALATIA 5:19-21).

Usikae na kufurahia kuwepo tu kanisani hali hujulikani na Mungu; Lazima wakati wote ulenge kujulikana na Mungu, Mungu akikujua hata mashetani yanakujua. Paulo alijulikana na Mungu na mashetani pia yalimfahamu kuw asi mtu wa mchezo(MATENDO YA MITUME 19:15).

Tunatakiwa kuwa watu tulio dhamiria kwenda mbinguni.

Ukiona maisha ya wokovu ni magumu kwako fahamu kwamba hujaokoka. Kama hujaacha dhambi/maovu halafu unalitaja jina la Bwana kwa kufanya hivyo unalitaja jina la Bwana bure.

Unapoasi unakuwa dhihaka mbele za adui yako, Mungu huwaachia adui zetu watupige(KUTOKA 32:25-35).

Kama hujaacha maovu wewe hauko upande wa Bwana. Aliyeupande wa Bwana hatendi yaliyo machukizo mbele za Mungu. Tunapokuwa kinyume cha Bwana tunapatilizwa.

Walio upande wa Bwana wakati wote wanalenga kumpendeza Mungu na si kuwapendeza wanadamu. Tunapaswa tuone fahari juu ya Bwana na si vitu vingine kwa maaana vitu vingine hupotea(1 WAKORINTHO 1:31).

Roho zinazopenda kwenda mbinguni zinapenda neon la Mungu lisiloghoshiwa. Roho hiyo inapolisikia neon hulifurahia. Mtu ambaye hajaokoka hukwaza na neno la Mungu.

Mtu anayejulikana na Mungu hana maneno mengi, kwani kwenye maneno mengi hapakosi uovu(MITHALI 10:19). Tuyatumie maneno hayo kuhubiri injili na si kujibariki wenyewe na kuwasema wengine kwa ubaya. Kilicho kinyume na Mungu tukiweke pembeni. Tunapaswa tuwe wamoja wala mafarakano yasionekane kati yetu (1 WAKORINTHO 1:10-13).

 Hatupaswi kuwa na makundi katika nyumba ya Mungu sote tu watoto wa baba mmoja(YOHANA 1:12-13) Yesu na Baba ni wamoja hivyo nasi ni vyema tukawa wamoja (YOHANA 10:30). Lazima tumpendezeshe Mungu wakati wote na si kua na hofu ya Mungu ya kipindi. Tusipende kutenda makosa kwa sababu kila kosa lina ujira/mshahara wake(WAEBRANIA 1:1-3)

Safari ya kwenda mbinguni haihitaji kusukumwasukumwa kwani ni kwa faida yetu wenyewe.

Hakuna amani ya Bwana kwa watenda dhambi, dawa ni KUTUBU ili upate neema ya kushi maisha yanayompendeza Mungu na kutazamia kuingia mbinguni

Je, unajijua bado hujajulikana na Bwana? Unajua bado dhambi zinakusumbua, sasa ni wakati wa kupokea uwezo wa kushinda dhambi. Tunashinda dhambi kwa kufanyika watoto wa Mungu(YOHANA 1:12). Fuatisha maneno haya ili upokee wokovu…Sema “ Mungu Baba, nasema ahsante kwa neno lako, nimegundua kuwa mimi sikupendezi wewe bali nimekuwa mtu wakuwapendeza wanadamu . Sasa nakuja kwako nikihitaji ondoleo la dhambi, nisamehe makosa yangu na unipe uwezo wa kushinda dhambi ili nikupendeze wewe wakati wote katika jina la Yesu Amen. 

Written by Zachary John Bequeker - Mwanza +255625966236

Pakua App Ya Injili Halisi -Bofya Hapa

HII NI INJILI HALISI MINISTRY, KWA MAWASILIANO +255 621 261 295