JUMAPILI YA MITENDE/MATAWI 2019

    Na Mwinjilisti Zachary John Bequeker

   +255625966236/+255758590489

Jumapili ya Mitende au Jumapili ya matawi ni Jumapili kabla ya pasaka ambayo huanza wiki takatifu.

Ni siku ambayo tunakumbuka na kusherehekea siku Yesu alipoingia Yerusalemu kama Mwokozi na Mfalme.

Yesu akiwa amempanda punda kuingia katika mji wa Yerusalemu umati mkubwa wa watu walikusanyika wakatandaza matawi yao ya mitende na  mavazi yao njiani, wakimpatia heshima ya Kifalme. Mamia ya watu walipaza sauti zao wakisema " Hosana, Mwana wa Daudi; ndiye mbarikiwa, yeye ajaye kwa jina la Bwana; Hosana juu mbinguni."

MATHAYO  21:1-11 – Yesu aliingia Yerusalemu kama Mfalme.

“1 Hata walipokaribia Yerusalemu, na kufika Bethfage, katika mlima wa Mizeituni, ndipo Yesu alipotuma wanafunzi wawili akiwaambia,2 Enendeni mpaka kijiji kile kinachowakabili, na mara mtaona punda amefungwa, na mwana-punda pamoja naye; wafungueni mniletee…..7 wakamleta yule punda na mwana-punda, wakaweka nguo zao juu yao, naye akaketi juu yake. 8 Watu wengi katika ule mkutano wakatandaza nguo zao njiani; na wengine wakakata matawi ya miti, wakayatandaza njiani.9 Na makutano waliotangulia, na wale waliofuata, wakapaza sauti, wakisema, Hosana, Mwana wa Daudi; ndiye mbarikiwa, yeye ajaye kwa jina la Bwana; Hosana juu mbinguni. 10 Hata alipoingia Yerusalemu, mji wote ukataharuki, watu wakisema, Ni nani huyu?11 Makutano wakasema, Huyu ni yule nabii, Yesu, wa Nazareti ya Galilaya.”

Jumapili ya mitende ndio mwanzo wa wiki takatifu ambayo ni siku maalumu  ambayo Yesu alianza safari yake kuelekea msalabani.

Neno la Mungu linatuambia watu walikata matawi ya mitende na kuyapunga hewani na mengine wakayatanda chini naye Yesu akapita juu yake akiingia katika mji wa Yerusalemu.Matawi ya mitende yanawakilisha mema na ushindi na ilikuwa ni alama yaa ushindi mkubwa juu ya kifo.

              1 WAKORINTHO 15:55 “Ku wapi, Ewe mauti, kushinda kwako? U wapi, Ewe mauti, uchungu wako?”

Yesu alichagua kupanda punda ambacho ni kitu kilichotimiza unabii wa Agano la Kale katika ZEKARIA 9:9. Katika kipindi cha biblia ilikuwa wafalme wakilakiwa wakiwa wamepanda punda. Punda huwakilisha amani, kwa hiyo wale waliomlaki walionesha kujawa na amani. Yesu anatajwa kuwa ni Mfalme wa amani.   

           ZEKARIA 9:9 “ Furahi sana, Ee binti Sayuni; Piga kelele, Ee binti Yerusalemu; Tazama, mfalme wako anakuja kwako; Ni mwenye haki, naye ana wokovu; Ni mnyenyekevu, amepanda punda, Naam, mwana-punda, mtoto wa punda.”

Watu walipiga kelele wakisema “Hosana! Ndiye mbarikiwa ajaye kwa jina la Bwana” walimtambua Kristo kuwa ni Mfalme. Neno “Hosana”  linamaanisha “Okoa sasa”. Walisema “Hosana” wakitambua yeye ndiye mwokozi ambaye muda si mrefu anaenda kuwapatia wokovu.

 YOHANA 12:12-15 “12 Nayo siku ya pili yake watu wengi walioijia sikukuu walisikia ya kwamba Yesu anakuja Yerusalemu; 13 wakatwaa matawi ya mitende, wakatoka nje kwenda kumlaki, wakapiga makelele, Hosana! Ndiye mbarikiwa ajaye kwa jina la Bwana, Mfalme wa Israeli! 14 Naye Yesu alikuwa amepata mwana-punda, akampanda, kama vile iliyoandikwa, 15 Usiogope, binti Sayuni; tazama, Mfalme wako anakuja, amepanda mwana-punda.”

ZABURI 118:25-26 “25 Ee Bwana, utuokoe, twakusihi; Ee Bwana, utufanikishe, twakusihi. 26 Na abarikiwe yeye ajaye kwa jina la Bwana; Tumewabarikia toka nyumbani mwa Bwana.”

WARUMI 10:9 “9 Kwa sababu, ukimkiri Yesu kwa kinywa chako ya kuwa ni Bwana, na kuamini moyoni mwako ya kuwa Mungu alimfufua katika wafu, utaokoka.”

Biblia inasema kwamba “Yesu aliulilia mji”. Kipindi wanaendelea kushangialia Yesu alitambua moyoni mwake kuwa muda si mrefu ujao hao wanaomshangilia watamgeuka, watamsaliti na  kumuua. Moyo wake ulihuzunika na kuona jinsi walivyokuwa wakimhitaji Mwokozi.

LUKA 19:41-42 “41 Alipofika karibu aliuona mji, akaulilia, 42 akisema, Laiti ungalijua, hata wewe katika siku hii, yapasayo amani! Lakini sasa yamefichwa machoni pako.”

Jumapili ya Matawi inatukumbusha kuwa Kristo ni mkuu kuliko mtu yeyote yule. Katika dunia ya le wanadamu hutafuta mtu wa kupigana naye ili wapate ushindi lakini yesu kwa upendo wake akawa tayari kupigana kwa ajili ya ulimwengu wote na akatupatia ushindi mkuu kupitia kifo chake. Na hii ndio sababu kuu ya kusheherekea juma hili. Kwa sababu ya Sadaka ya Kristo pale msalabani tumewekwa huru kutoka katika mauti, yaani mauti ya milele na kuwekwa katika uzima wa milele.

                                                                                                                                                 

             YOHANA 11:25 “25 Yesu akamwambia, Mimi ndimi huo ufufuo, na uzima. Yeye aniaminiye mimi, ajapokufa, atakuwa anaishi”

Tunapaswa kufurahi sana katika kipindi cha juma hili.

Adui analijua hilo na unaweza kukisia kuwa katika juma hili hawezi kuupata ushindi kamwe.        

Katika juma hili takatifu, namwomba Mungu mawazo yetu kuwaza juu ya Kristo aliye Mfalme wetu.

Tuelekeze akili zetu katika kumwabudu Bwana wetu, kumshukuru kwa zawadi njema ya sadaka yake, kusheherekea nguvu ya ufufuo, na maisha mapya tunayoyapata kwake.

             2 WAKORINTHO 9:15 “15 Mungu ashukuriwe kwa sababu ya kipawa chake, tusichoweza kukisifu kama ipasavyo.”

BONYEZA HAPA KUUNGANA NASI FACEBOOK: INJILI HALISI

Pakua App Ya Injili Halisi -Bofya Hapa

HII NI INJILI HALISI MINISTRY, KWA MAWASILIANO +255 621 261 295