JE, BIBLIA INARUHUSU MWANAMUME KUWA NA ZAIDI YA MKE MMOJA(NDOA ZA MITALA)?

Ndoa za mitala hufanyika kwa wingi Afrika na kwa watu wa Imani ya kiislamu.
Ndoa hizi mwanamume mmoja anaoa zaidi ya mwanamke mmoja.
»Watu wengi wamekuwa wakifikiri ndoa za mitala ni sahihi na zinakubalika mbele za Mungu. Je, ni kweli? Hapana! Ili jambo liwe sahihi ni lazima liwe limekubaliwa na Mungu.
»Mungu ndiye aliyeanzisha ndoa ulimwenguni.

»Alimfanya mtu wa kwanza Adamu(MWANZO 1:26). Akaona si vyema awe peke yake. Hivyo akamfanya "MKE " kwa ajili ya Adamu.

»Kama Mungu alitaka Adamu awe na wake wengi; angemfanyia zaidi ya mmoja. Lakini aliona mmoja anatosha.

»Mwanadamu katika tamaduni zake tofauti akaleta mawazo mengi juu ya ndoa ulimwenguni. Baadhi ya mawazo ya mwanadamu huwa sawa na mpango wa Mungu. Baadhi ya mawazo ya mwanadamu hayakubaliani na mpango wa Mungu.
»Ndoa ya mitala imeanzishwa na mwanadamu (ni man-made) na si mpango wa Mungu katika ndoa.

»Chochote kile ambacho hakikubaliani au hakiendani na kile alichokifanya Mungu au kukisema ni DHAMBI.

»Mpango wa Mungu niMUME MMOJA na  MKE MMOJA(MWANZO 2:21-24)

MIFANO YA WANAUME WALIOOA WAKE WENGI KWENYE BIBLIA

»Kuna mifano mingi ya mitala katika biblia.

1: LAMEKI alikuwa ni mtu wa kwanza na mwanzilishi wa ndoa za mitala. Lameki alikuwa na wake wawili. Alikuwa muuaji na hakuna jema linalotajwa juu yake(kuhusu yeye).. (MWANZO 4:19-24).

2:ABRAMU pia alikuwa  katika mitala. Mke wake Sarai, hakuweza kupata watoto. Akampatia ABRAMU kijakazi wake ili azae naye. Baadaye Sarai akamwonea wivu hajiri. Ndoa hii ilikuwa imejaa shida.

3: ESAU alioa wanawake wawili wa Kihiti walisababisha huzuni kubwa kwa wazazi wake,Isaka  na Rebeka. Ndoa za mitala huathiri mahusiano(MWANZO 26:34-35).

4: Gideoni alikuwa ni kiongozi Mkuu na jasiri. Alipata watoto 70 Kutoka kwa wanawake  wengi. Pia alikuwa na suria(mchepuko)  mmoja aliyemzalia mwana. Ni aina gani ya baba atakayekuwa mwenye watoto 70? Je, atawalea ipasavyo? Si jinsi Mungu atakavyo sisi tuwe (WAAMUZI 8:30-31).

5: Mfalme Sulemani alikuwa na wanawake 700, binti za wafalme na masuria 300(michepuko 300) . Kilichoyumbisha na kuangusha utawala wake Sulemani ni ndoa za mitala (1 WAFALME 11:3-13).

»HAKUNA popote katika biblia panapoongelea mema juu ya ndoa za mitala. Pote palipokuwa na mitala kulikuwa kumejaa matatizo, na hii haibadiliki hadi Leo. Leo ndoa nyingi za mitala zimejaa matatizo.

KANUNI ZA KIBIBLIA KUHUSU NDOA ZA MITALA

»Hebu tuone kanuni za kibiblia zinazotufundisha kinyume na mitala:-
1: Tukisoma katika MWANZO 2:23-24 "Mwanamume atamuacha baba yake na mama yake naye ataambatana(ataungana) na na mkewe" Mungu hakusema "WAKE" bali alisema "MKE".

2: Paulo analinganisha Mke na mume kama Yesu na Kanisa (WAEFESO 5:23). Kanisa ni mwili wa Kristo(WAEFESO 5:22-23). Kuna mwili mmoja tu, ambao ndio kanisa (WAEFESO 4:4) .Mwanamume angeweza kuwa na wanawake wengi kama Yesu angekuwa na makanisa mengi. Kristo ana kanisa moja pekee, hivyo mwanamume anapaswa kuwa na Mke mmoja pekee.

»HAKUNA mahali popote katika biblia panasema mwanamume awe na wake wengi na kuwa ni sahihi.

»MATHAYO 19:3-9 Inazungumzia TALAKA. Yesu anadhihirisha kwamba Mungu hataki mwanamume au mwanamke kuachana au kutalakiana. TALAKA ni moja ya vyanzo vya wanamume kuwa na wake wengi.

» Mungu hahitaji mwanamume awe na Mke zaidi ya mmoja. Yesu akasema "Mwanamme atamwacha babaye na mamaye, ataambatana(ataungana) na mkewe; na hao wawili watakuwa mwili mmoja". Yesu alizungumzia ndoa ya Mke mmoja na Mme mmoja.

»Pale Mwanamume anapokuwa na Mke zaidi ya mmoja; afanya DHAMBI. Mungu huchukia dhambi.

»Katika 1 TIMOTHEO 3:2 na 12 Tunaambiwa kwamba kiongozi wa kanisa lazima awe ni mume wa Mke mmoja. Kwanini siyo wawili wala zaidi? Kama lingekuwa ni jambo jema, kwanini viongozi wa kanisa hawapaswi kuwa katika mitala? Sababu ni kwamba MUNGU HATAKI AINA HII YA NDOA(Mitala). Wanaofanya hivi wanatenda dhambi mbele za macho ya Mungu. Hii si kwa viongozi wa kanisa wala kwa washirika, bali ni kwa wote.

MATATIZO YA NDOA ZA MITALA

»Hebu tuone matatizo ya ndoa za mitala katika biblia:-

1: Husababisha wivu na ugomvi 

»Tunaona wengi wanaoishi katika ndoa za mitala leo jinsi ilivyo na wengine hujiua au kuua. 

»Yusufu aliuzwa utumwani Misri na nduguze kwa sababu ya wivu uliotokana na ndoa ya mitala.

2: Mwanamume hawezi kuwa mwanamume kamili(proper husband) kwa wake zake.

3:Mwanamume hawezi kuwa baba kamili kama lilivyo lengo la Mungu. Kama mwanamume ana watoto wengi atawezaje kuwalea katika"adabu na maonyo ya Bwana" (WAEFESO 6:4)?.

4: Hufanya mwanamume kuwa mbali na Mungu kuliko kuwa karibu na Mungu. Hatupaswi kufanya lolote litakalotufanya tuwe mbali na Mungu.

NINI CHA KUFANYA?

»Jambo la kufanya kwa mwanamume aliye katika ndoa hii anayetaka kuwa Mkristo kweli kweli.

1: Atambue kwamba ni mwenye dhambi na aliyepotea.

2:Amwamini Yesu kristo kuwa ni mwana wa Mungu(MARKO 16:16).

3: Atubu; Lazima aachane na maovu yake yote katika maisha yake na katika ndoa yake. Na ni lazima awaache hao   wanawake isipokuwa yule wa kwanza anayefahamika pande zote mbili; kwa mume na kwa Mke. (MATENDO YA MITUME  10:10, MATENDO YA MITUME 2:38).

4: Sasa yuko tayari KUBATIZWA. Kubatizwa ni kuzikwa katika maji(WARUMI 6:3-4). Na hivi ndivyo kila mmoja anapaswa kufanya ili kuwa MKRISTO.

»JE, UNAISHI KATIKA MITALA? BADILIKA LEO UWE MKRISTO KWELIKWELI. ACHANA NA MAFUNDISHO YA UONGO. KUNA FAIDA GANI YA KUPATA WANAWAKE WENGI HALAFU UKAIKOSA MBINGU?

Ni mimi EV. Zachary John Bequeker _Mwanza Tanzania. 

Wasiliana nami kwa WhatsApp/IMO/Telegram/SMS/Piga +255625966236.

Barikiwa na Bwana!!!

Pakua App Ya Injili Halisi -Bofya Hapa

HII NI INJILI HALISI MINISTRY, KWA MAWASILIANO +255 621 261 295